ហ្វីលីពីន៖ មនុស្សចំនួន ៥០នាក់បានស្លាប់បាត់បង់ជីវិត និងរាប់សិបនាក់ផ្សេងទៀតបានរបួសធ្ងន់ និងស្រាល ក្នុងហេតុការឧបទ្ទវហេតុធ្លាក់យន្តហោះយោធាមួយនៅក្នុងប្រទេសហ្វីលីពីន។ 

បើតាមប្រភពព័ត៌មានបានឱ្យដឹងថា យន្តហោះដែលធ្លាក់នោះជាប្រភេទយន្តហោះ Lockheed C-130 ជាប្រភេទយន្តហោះចម្បាំងដែលដឹកមនុស្សចំនួន ៩៦នាក់ ភាគច្រើនគឺជាយោធា ត្រូវបានហោះចេញពីអាកាសយានដ្ឋាន Jolo ក្នុងខេត្ត Sulu។ ក្នុងចំណោមអ្នកនៅក្នុងយន្តហោះ ដែលភាគច្រើនជាយោធានោះ ត្រូវបានគេដឹងថាត្រូវបញ្ជូនដោយរដ្ឋាភិបាលហ្វីលីពីន ដើម្បីទប់ទល់ទៅនឹងការបះបោររបស់ក្រុមសកម្មប្រយុទ្ធឥស្លាមក្នុងប្រទេសហ្វីលីពីន ដូចជាក្រុមប្រយុទ្ធឥស្លាម អាប៊ូ សាយ៉ាហ្វជាដើម។

បើតាមការជូនដំណឹងផ្លូវការរបស់ក្រសួងការពារជាតិហ្វីលីពីនបានឱ្យដឹងថា បើទោះជាភាគច្រើនជាកងកម្លាំងនៅលើយន្តហោះនោះ តែបើតាមរបាយការណ៍ដែលទទួលបានក៏មានជនស៊ីវិលចំនួន ៣នាក់បានស្លាប់ក្នុងហេតុការណ៍នេះដែរ ខណៈអ្នកនាំពាក្យម្នាក់របស់អង្គភាពទ័ពអាកាសហ្វីលីពីនវិញបានប្រាប់ថា ក្រុមស៊ើបអង្កេតកំពុងស្វែងរកប្រអប់ខ្មៅក្នុងយន្តហោះ ដើម្បីបានដឹងពីហេតុការណ៍មុននឹងយន្តហោះនេះជួបហេតុការណ៍អាក្រក់ខាងលើ ស្របពេលលោកឧត្តមសេនីយ៍ហ្វីលីពីន Edgard Arevalo ថ្លែងថា មើលទៅទំនងជាមិនមែនមកពីការវាយប្រហារណាមួយនោះឡើយ។

គួរបញ្ជាក់ឱ្យដឹងដែរថា យន្តហោះ Lockheed C-130 នេះបានធ្លាក់នៅម៉ោង ១១:៣០នាទីថ្ងៃត្រង់ (ម៉ោងនៅហ្វីលីពីន)​ នៅតំបន់ភាគខាងត្បូងកោះមិនដាណាវ។ បើតាមទិន្នន័យពីប្រព័ន្ធគ្រប់គ្រងសុវត្ថិភាពអាកាសបានឱ្យដឹងថា យន្តហោះដែលធ្លាក់នេះបានប្រតិបត្តការតាំងពីឆ្នាំ​ ១៩៨៨មកម្ល៉េះ ដែលមានន័យថាវាអាចធ្លាក់ដោយសារតែបញ្ហាបច្ចេកទេស ជាជាងធ្លាក់ដោយការវាយប្រហារណាមួយ៕